37,1

12030687_10206944350784582_1799896155_n

რამდენიმე თვეში ორი წელი გახდება, რაც დაბალი სიცხე მაქვს. რომ ვთქვა, ყველა საღამოს ვაკონტროლებ და ვიზომავ-მეთქი, პირველივე აბზაცში მაგარი ტყუილი იქნება, თან ნაკლებად საჭირო. ორ-სამ თვეში ერთხელ, სახლში სადმე თერმომეტრს რომ გადავეყრები, უფრო სწორად, თითქოს თვითონ რომ აღიმართება ჩემ წინ, როგორც გადაულახავი კედელი, ან მოქნეული მუშტი, ვნებდები, ჯანდაბას შენი თავი-მეთქი, და ათი წუთის განმავლობაში ჩახუტებული მყავს. მერე ხელის კანკალით (აქ უკვე ვამეტებ) ვიღებ, ვაკვირდები და ისეთი შეგრძნება მიჩნდება– დამარცხების თუ სადღაციდან გადმოვარდნის. რამდენიმე შორისდებულს ვამბობ გაბრაზებულ-დაბნეული და ვიწყებ შეკითხვებს დამამშვიდებელი პასუხების მისაღებად, რომ უკვე ყველა ანალიზისა და შემოწმების შემდეგ, საშიში არაფერია და ხდება ხოლმე რაღაც პერიოდის მანძილზე, წლობითაც კი, ასეთი ამბავი სხვების ცხოვრებაშიც.

ერთხელ იყო, მიკროავტობუსში ავედი, უფრო სწორად, კი არ ავედი, გაჩერებაზე კაცს ვთხოვე, ფეხს რომ შევდგამ, ხელით მომაწექი, კარი რომ მოვხურო-მეთქი. დავდექი და თავი მაღლა ავწიე ჰაერის ჩასასუნთქად. გვერდით ორი ქალი საუბრობდა, მე კი ფეხზე მეკიდა მათი ამბები, მაგრამ ერთ-ერთმა რომ ახსენა, წელიწად-ნახევარია სიცხე აქვს ჩემს ბიჭს,ანალიზები გავუკეთეთ და ნორმაში აქვს ყველაფერიო, ხელების გაშლა რომ შემძლებოდა, გულში ჩავიკრავდი.

მოკლედ, ამ ამბავმა ჩემი ნერვები და ფსიქიკა ისე არია, როგორც ისედაც არეულ ოთახში ფეხები და ხელები იქნიო დიდხანს.ტუბცენტრში ვიდექი მოძრავ აპარატებს შორის და ფანჯრის იქით მყოფ ექიმების ჯგუფს ნერვულად ვუქნევდი თავს უარყოფის ნიშნად, არ ვარ დაავადებული-მეთქი. არადა, ეგრე მათ უნდა გაეკეთებინათ და ერთ-ერთმა რომ მომბაძა და სხვებიც აყვნენ, ჩამოვხტი რაღაც თეთრი გილიოტინა-რობოტიდან და ნახევრადშიშველი გამოვვარდი გარეთ, – აბა, წავედი, ჯიგარო, მადლობა-მეთქი, –მივაძახე მაღალ ექიმ-სიკვდილის ფორმულას და დავითესე. მერე სისხლის ანალიზები ვენიდან, თითიდან, ეს იქ წაიღე, იქიდან რომ გამოხვალ, გაიხადე იქ შედი და ექიმს დაელოდე, აქ ჩაიცვი და ფული გადაიხადეო და დავდიოდიმე, უკვე არა თორნიკეჭელიძე, მე –ბატონი 37,1.

ერთადერთი, რაც ამ ორი წლის მანძილზე მუდმივად მშველოდა, ვიქტორ ცოი იყო. იყვნენ სხვებიც და არიან, სადღაც იქიდან რომ გიდგანან გვერდში ადამიანს, სადაც ყველა წავალთ, მაგრამ ცოი მაინც განსაკუთრებულად. გამოვიდოდი თეთრი დერეფნებიდან, კათეტერგამობმული, ეტლში მჯდარი მოხუცების ნახევრადშეშლილ სახეებს და შარდის სუნს მოვშორდებოდი, ვიღებდი ტელეფონს, ყურთსასმენებს ვიმაგრებდი და ვხდებოდი ის, ვინც მინდოდა ვყოფილიყავი, რომ ჩემს ყოფნას რქმეოდა ცხოვრება და ვყოფილიყავი მარილი ამ ყოველდღიური გულისამრევი თუ გემრიელი სოუზის – ცხოვრების.

„Ночь пришла а за ней гроза
Грустный дождь да ветер-шутник
Руки в карманы, вниз глаза
Да за зубы язык“

ისე მღერის, თითქოს შენზე წერს, შენზე, ვინც მას უსმენ. მიდიხარ ჯიბეებში ხელებჩაწყობილი, ჯიბეში ის სიგარეტი გაქვს, მეორე სიმღერაში რომ ახსენებს, თვალებს დაბლა ხრი და მიდიხარ უთქმელად, ჩუმად და მერე ჩაგესმის:

„Пей да гуляй, пой да танцуй
Я с тобой пока“

ამ სიტყვებს შეუძლია ცხოვრების ჯოჯოხეთიდან ამოგიყვანოს. იესომაც ასე არ უთქრა თავის მოწაფეებს, რომ ვიდრე მე თქვენთან ვარ, იმხიარულეთ და როცა წავალ, შემდეგ იმარხულეთო. იცი, რომ მარტო მიდიხარ, მაგრამ რაღაც თუ ვიღაც მოგყვება გვერდით. ჯანდაბა, შეიძლება გაგიჟდე, მარტო და თან ვიღაცასთან ერთად! იმდენად რეალურია, ხელსაც კი გადახვევ და დაეყრდნობი და უმეორებ შენს თავს, რომ იცხოვრო, განა იქამდე, ვიდრე ცოცხალი ხარ, იცხოვრო ყოველთვის და ყველგან, იმიტომ, რომ თუ ერთხელ, ერთი წამის მემილიარდედ ნაწილში მაინც გერქვა ცოცხალი, სულ ეგრე იქნება და არ იარსებებს სიკვდილი! განა ადამიანს ერთ დღეს სხვა სახელი ჰქვია და მეორე დღეს –მეორე, ან კალიუმი იოდად გადაიქცევა?..

ლიტერატურა, ტექსტი ერთ-ერთი სიკეთეა, რის შუქშიც ყოველთვის შეგიძლია დადგე და დაინახო, რომ არსებობ, გაქვს საკუთარი შუქ-ჩრდილები. შეგიძლია, როგორც ელემენტი, ისე დატენო საკუთარი გონება, სული, სხეული მისი სინათლით და ისევ უკან – ბნელში და ყოველდღიურ პრობლემებში გამოსულმა შენ თვითონ ანათო. ვიქტორ ცოი იმ წელს გარდაიცვალა, როცა მე დავიბადე. არც ჩემს ქვეყანაში ცხოვრობდა, არც ჩემი მშობლიური ენა იცოდა, მაგრამ, რაღაც ოხრად, ისეთი შეგრძნება მაქვს, თითქოს მიცნობდა. მოკლედ, თვითონ აზრზე არ იყო ამის შესახებ, მაგრამ მისი ტექსტები იყვნენ და არიან.

სადღაც, სხვაგან სხვა კონტინენტებსა და მატერიკებზეც ძირითადად იგივე ხდება, რაც ჩვენთან, განსხვავებული მხოლოდ სიმძაფრე და კონტრასტებია. ახლაღა მივხვდი, რა იწვევს ნერვოზს ჩვენში, ახლა, როცა ერთი თვე ჩემს მაღალმთიან სოფელში გავატარე. ქალაქების ქუჩებში რაღაც ვერაა რიგზე. ისეთი ამბავია, თითქოს ყველანი საძინელები ოთახებიდან კი არ გამოვედით გარეთ, საფლავებიდან წამოვდექით და მკვდრები დავხეტიალებთ. ბოლო ათწლეულებში ტექნიკისა და მეცნიერების უსწრაფესმა განვითარებამ, დიდმა პოლიტიკურმა ძვრებმა და სხვა რამდენიმე უმთავრესმა მიზეზმა ადამიანები შეგვცვალა. ინფორმაციის ის ზღვა, რასაც ტელეეკრანებიდან, სოციალური ქსელებიდან ვიღებთ, ზოგჯერ უარყოფითი შედეგის მომტანიც გახდა ჩვენთვის, მაგრამ მე ახლა ამაზე არ მინდა გავაგრძელო. უბრალოდ, ლიტერატურაზე ვსაუბრობ; სიტყვებზე, აზრებზე, პერსონაჟებზე, ემოციებზე, იდეებსა და იმედებზე, რითაც სავსეა წიგნები, სიმღერების ტექსტები და აქ ვამთავრებ წერას, რომ ადგე და ის წიგნი გადაშალო, რომელიც ადამიანივით გვერდით მოგყვება ყოველთვის, იმ სიმღერის ტექსტს ენდო, კბილის ტკივილის დროსაც კი რომ წაიღიღინებდი დათქვა, რომ შეიძლება ცხოვრება უმეტეს შემთხვევებში ისეთივე გულისამრევად პათეტიკური და მოსაწყენია, როგორც ამ ჩემი წერილის დასასრული, მაგრამ არსებობს ლიტერატურა, როგორც შავი ხვრელი, რომელიც ვარსკვლავების ნაცვლად, ადამიანებს ისრუტავს დედამიწაზე და სხვა, უკეთეს რეალობასა თუ განზომილებაში გადაჰყავს.

თორნიკე ჭელიძე

პოეტი

14 სექტემბრის საკითხავი

IMG_9973 - Copy

“გარეთ ახალი, შიგნით ნახმარი” – ამ გამოცანით მიულოცა ერთ-ერთი ცნობილი ქართული იუმორისტული ტელეშოუს წამყვანმა მოსწავლეებს საქართველოში ახალი სასწავლო წლის დაწყება. გამოცანის პასუხიც იქვე გაგვიმხილა  – პირველ კლასელების სასკოლო სახელმძღვანელო  – და განათლების სამინისტროს ახალი ინიციატივა, წლევანდელ სასწავლო წელს მოსწავლეებს ახალ გარეკანებში ჩასმული უკვე რამდენჯერმე გამოყენებული სახელმძღვანელოების შიგთავსით დახვდეს, ე.წ. ფასადური სახელმძღვანელოების პროექტად შერაცხა.

მე კი, ამ ბლოგში გამომცემლის პროფესიაზე მინდა მოგიყვეთ, ამ სფეროს გამოწვევებსა და წინააღმდეგობებზე. რამდენიმე წლის წინ, როცა ახალგაცნობილი ადამიანები ჩემი საქმიანობის შესახებ მეკითხებოდნენ, ვპასუხობდი: გამომცემელი, და უნდა ვაღიარო, დიდ ვერაფერ შთაბეჭდილებას ვახდენდი მათზე. უფრო მეტად კი დაბნეულობას ვიწვევდი ამ მოულოდნელი პასუხით. რა შეიძლება იყოს იმის მიზეზი, რომ მთელ მსოფლიოში ერთ-ერთ ყველაზე საპატიო და პრესტიჟულ საქმიანობად აღიარებული პროფესიის შესახებ ჩვენს ქვეყანაში, მათ შორის არც სახელისუფლებო წრეებში, ბევრი არაფერი იციან? იქნებ ის, რომ საქართველოში დღესდღეობით ჯერ კიდევ არც თუ ისე ბევრი ადამიანი ყიდულობს და მით უფრო, კითხულობს წიგნს?! ბოლო დროს ვითარება სხვა მიმართულებით შეიცვალა, ახალგაცნობილი ადამიანების ჩაკითხვამაც ასეთი ფორმები შეიძინა: აჰ, თქვენ ის ხართ,სახელმწიფომ სახელმძღვანელოები რომ წაგართვათ?  თქვენ განათლების სამინისტროს არ ებრძვით? მომიყევი ერთი, მაინც რა ხდება ამ სახელმძღვანელოებზე, იმ დღეს მოვისმინე, სამინისტრო თითო წიგნს 1600 ლარად ბეჭდავსო, და მრავალი სხვა.

რამ შეიძლება განავითაროს და გააძლიეროს უამრავი პრობლემითა და გასაჭირით დახუნძლული ჩვენისთანა პატარა ქვეყანა? ალბათ ყველა შევთანხმდებით იმაზე, რომ – რაც შეიძლება ბევრმა პროფესიონალმა კადრმა, განათლების მაღალმა დონემ, მაღალმა ინტელექტმა.

90-იან წლებში, საბჭოთა კავშირის რღვევის შემდეგ საქართველოში პირველი დამოუკიდებელი გამომცემლობები აღმოცენდნენ და ელვის სისწრაფით განვითარდნენ. მათ საკუთარი, პროფესიული რევოლუცია მოახდინეს, რაც იმაში გამოიხატა, რომ პოსტსაბჭოთა ქვეყნებს შორის ერთ-ერთმა პირველებმა მოახერხეს ქართველი მოსწავლეებისთვის სამუდამოდ დაევიწყებინათ უალტერნატივო საბჭოთა სახელმძღვანელოები და აბსოლუტურად კონკურენტულ გარემოში, ქართველ ავტორებთან ერთად, საერთაშორისო სტანდარტების ალტერნატიული ქართული სახელმძღვანელოების შექმნა დაეწყოთ. და,რაც განსაკუთრებით მნიშვნელოვანია, მათ შორის, არაქართულენოვანი (სომხური, აზერბაიჯანული, რუსული) სკოლებისთვისაც კი. პარალელურად კი არანაკლები წარმატებით გამოიცემოდა მსოფლიო თუ თანამედროვე ქართული ლიტერატურა.

2013 წელს ხელისუფლების წარმომადგენლებმა გამომცემლები ნარკოდილერებს, წურბელებს შეგვადარეს,მოგვიანებით დაგვიწუნეს მენეჯმენტი, ჩვენი ჯიბეები გასქელებულად გამოაცხადეს და მათ დაუყონებლივ გათხელებაზე დაიწყეს ზრუნვა. პირველ წელს უფასო სასკოლო სახელმძღვანელოების პროექტმა, რომელიც განათლების სამინისტროს მიერ ქართული გამომცემლობებისა და ქართველი ავტორების კუთვნილი სახელმძღვანელოების მისაკუთრებას, ამ სახელმძღვანელოების სამინისტროს მიერ სახელმწიფო ბიუჯეტით დაბეჭდვასა და მოსწავლეებისთვის ჩუქებას, შესაბამისად, ავტორებისა და გამომცემლების შემოსავლის გარეშე დატოვებასა თუ გაკოტრებას გულისხმობდა, “გაამართლა”. საპრეზიდენტო არჩევნები დიდი წარმატებით ჩატარდა. საზოგადოება კი კიდევ ერთხელ შეიყვანეს შეცდომაში, დააჯერეს, რომ ამ სამყაროში კიდევ დარჩა “რამე”, რაც შეიძლება უფასო იყოს და შესაძლებელია, რომ ეს “რამე” სრულიად უანგაროდ გაჩუქონ. დაავიწყეს უჰონორაროდ და,შესაბამისად, საარსებო წყაროს გარეშე დარჩენილი ავტორები, რომლებიც წლობით მუშაობდნენ მათი შვილებისთვის მაღალი სტანდარტის სახელმძღვანელოების შესაქმნელად, დაავიწყეს გამომცემლები, რომლებიც ყველაზე რთულ, 90-იან წლებში შეეჭიდნენ ამ ერთი შეხედვით ილუზიურ საქმეს და სიამოვნებით მიაღებინეს სკოლის მერხებზე მათი შვილებისთვის ჩამორიგებული საჩუქრები. საბოლოოდ კი, დაკნინდა და გაუფასურდა საქართველოს კონსტიტუციით ხელშეუვალად წოდებული ინტელექტუალური საკუთრების უფლება. ქართველი გამომცემლები და ავტორები კი ამ დრომდე ქართულ სასამართლოში ცდილობენ სამართლიანობის აღდგენას და, საჭიროების შემთხვევაში, სტრასბურგშიც აპირებენ ბრძოლის გაგრძელებას.

2014 წელს, მსოფლიოს ერთ-ერთ უმნიშვნელოვანეს, მასშტაბურ ღონისძიებაზე, ფრანკფურტის წიგნის ფესტივალზე, რამდენიმეწლიანი დაუღალავი მონდომებისა და შრომის შედეგად, ქართულმა საგამომცემლო სექტორმა 2018 წლის საპატიო სტუმრის სტატუსი მოიპოვა. გაჭირვებით თუ მახსენდება საქართველოში რომელიმე სახელოვნებო სფერო, რომელსაც ამ რანგის საერთაშორისო წარმატებისთვის მიეღწიოს. ჩვენ ალბათ ჯერ კიდევ არ გვაქვს ბოლომდე გაცნობიერებული, რამხელა პოლიტიკური და კულტურული მნიშვნელობა აქვს ამ ფაქტს, რომელსაც, წარმატებით განხორციელების შემთხვევაში, შესაძლოა,შედეგად ევროინტეგრაციისკენ გადადგმული არა თუ დიდი ნაბიჯი, არამედ ნახტომიც კი მოჰყვეს, ასევე – ქართული კულტურის საერთაშორისო აღიარება და ტურიზმის აყვავება.

ამ ფონზე კი, მაშინ, როცა 2018 წლამდე დარჩენილი რამდენიმე წლის განმავლობაში ქართული საგამომცემლო სექტორის სიძლიერე და აქტიურობა განსაკუთრებით მნიშვნელოვანი და აუცილებელია, უფასო სასკოლო სახელმძღვანელოების პროექტის შედეგად საქართველოში2014-2015 წლებში დაიხურა რამდენიმე მნიშვნელოვანი წიგნის მაღაზია, სტამბა, გამომცემლობებმა შეამცირეს მხატვრული ლიტერატურის გამოცემა. უმუშევარი დარჩა ამ სფეროში დასაქმებული უამრავი ადამიანი. შესაბამისად, ისინიც შეუერთდნენ იმ ადამიანების მრავალრიცხოვან არმიას, რომლებიც ფინანსურად დამოკიდებულნი არიან ოჯახზე, ახლობლებზე, სახელმწიფოზე.

2015 წელს ზემოთ აღნიშნული პროექტის მნიშვნელოვნად შემცირებული ბიუჯეტის გამო, განათლების სამინისტრომ 650 000 მოსწავლისთვის მხოლოდ 41 000 ეგზემპლარი ახალი სასკოლო სახელმძღვანელოს დაბეჭდვა შეძლო, რაც ნიშნავს, რომ დღეს სკოლაში მისული ბავშვების აბსოლუტურ უმრავლესობას სკოლის მერხზე რამდენიმე გზის გამოყენებული, თუმცა ახალ გარეკანებში ჩასმული, აწ უკვე ფასადურ სახელმძღვანელოებად შერაცხული წიგნები დახვდებათ.

მიუხედავად ამ არც თუ სახარბიელო ფაქტისა, მინდა ყველა მოსწავლეს მივულოცო ახალი სასწავლო წლის დაწყება! ჩემი ღრმა რწმენით, ჩვენს საუკუნეში მხოლოდ მაღალი განათლება და პროფესიონალიზმია წარმატების ერთადერთი ფორმულა, ნებისმიერი სხვა ხერხითა და მეთოდით მიღწეული წარმატება კი დროებითი და წარმავალია.

დღეს ჩვენს საზოგადოებაში სულ უფრო აქტუალური გახდა გამოთქმა: უფასო ყველი მხოლოდ სათაგურშიაო. კარგია, რომ ამაზე მსჯელობა მაშინ დავიწყეთ, როცა ჯერ კიდევ შეიძლება ჩვენი მომავლის გადარჩენა და სწორ გზაზე დაყენება. სინამდვილეში, ალბათ ყველას კარგად გვესმის, რომ მცირე და საშუალო ბიზნესის განვითარების ხელშეწყობა არა ვინმეს ჯიბის გასქელების, არამედ, პირველ ყოვლისა, სამუშაო ადგილების ზრდის პირდაპირპროპორციულია, რაც, შესაბამისად, ჩვენს სულ უფრო მეტ თანამოქალაქეს ფინანსურ დამოუკიდებლობასა და პიროვნულ თავისუფლებას მიანიჭებს.

გილოცავთ პირველ ზარს!

გვანცა ჯობავა

საქართველოს წიგნის გამომცემელთა და გამავრცელებელთა ასოციაციის თავმჯდომარე

ახალი ბლოგი

Untitled

ძვირფასო მკითხველებო!სიხარულით გატყობინებთ, რომ საქართველოს წიგნის გამომცემელთა დაგამავრცელებელთა ასოციაციის ინიციატივით შეიქმნა ბლოგი, რომელიც გვსურს გახდეს საჯარო სივრცე ყველა ამ სფეროში მოღვაწე თუ ამ სფეროს გულშემატკივარი ადამიანისთვის, რათა მათ თავისუფლად გამოხატონ პოზიცია წიგნთან და ლიტერატურასთან დაკავშირებულ სხვადასხვა აქტუალურ საკითხებზე.

აქვე გვსურს აღვნიშნოთ, რომ ასოციაციის ბლოგზე განთავსდება სხვადასხვა ავტორების მიერ გამოთქმული მოსაზრებები ყოველგვარი შეზღუდვის გარეშე, რაც არ ნიშნავს იმას,რომ ბლოგზე გამოთქმულ პოზიციას იზიარებს ან ეთანხმება საქართველოს წიგნის გამომცემელთა და გამავრცელებელთა ასოციაცია.

ვფიქრობთ, რომ ასოციაციის ბლოგი უმოკლეს პერიოდში გახდება მკითხველისთვის საინტერესო და შექმნის ისეთ სივრცეს, სადაც თავს მოიყრის სხვადასხვა მოსაზრებები.პოსტის გამოქვეყნების მსურველებს შუძლიათ მოგვმართოთ ელექტრონულ მისამართზე: info@gpba.ge.

პატივისცემით,

თინათინ ბერიაშვილი,

აღმასრულებელი დირექტორი

საქართველოს წიგნის გამომცემელთა და გამავრცელებელთა ასოციაციის ისტორია

1996 წელს დაფუძნდა წიგნის გამომცემელთა და გამავრცელებელთა ასოციაცია.

1997

ჩატარდა თბილისის წიგნის პირველი ფესტივალი ევრაზიის ფონდის ფინანსური მხარდაჭერით.

შეიქმნა ქართულ გამომცემლობათა (და სტამბათა) პირველი კატალოგი, რომელიც გამოიცა ღია საზოგადოება ქართული ფონდის ფინანსური მხარდაჭერით (OSGF).

ასოციაციის ორგანიზებით ჩატარდა სემინარი _ „საავტორო უფლებების დაცვა შვედეთში“.

დაარსდა ნაციონალური სააგენტო ISBN ასოციაციისა და საქართველოს პარლამენტის ეროვნული ბიბლიოთეკის მიერ.

წიგნის ასოციაცია წარდგენილი იყო საფრანგეთის საერთაშორისო წიგნის ფესტივალზე.

1998

გამოქვეყნდა პირველი ეროვნული ბიბლიოგრაფია საქართველოს პარლამენტის ეროვნული ბიბლიოთეკის ფინანსური მხარდაჭერით.

1999

პროექტი სახელწოდებით: „ ქართული საგამომცემლო ინდუსტრიის გაუმჯობესება“ დაფინანსდა ევრაზიის ფონდის მიერ.

2000

ჩატარდა თბილისის წიგნის ფესტივალი ევრაზიის ფონდის ფინანსური მხარდაჭერით.

სემინარი- „გამომცემელთა მოთხოვნები“ , ორგანიზებული ღია საზოგადოება-ბუდაბეშტის ინსტიტუტის მიერ (OSI-Budapest).

2001

სემინარები- „საავტორო უფლებები“ და „ინდივიდუალური განათლება“, ორგანიზებული ღია საზოგადოება-ბუდაბეშტის ინსტიტუტის მიერ (OSI-Budapest)

თბილისის წიგნის ფესტივალი OSGF-ის ფინანსური მხარდაჭერით.

სემინარი- „მარკეტინგი და დისტრიბუცია წიგნის სექტორში“, ჩატარდა საფრანგეთის ყოველწლიური წიგნის ფესტივალის და თბილისის გოეთეს ინსტიტუტის ფინანსური მხარდაჭერით.

სემინარი- „წიგნის გამომცემლობა“, ორგანიზებული ღია საზოგადოება-ბუდაბეშტის ინსტიტუტის მიერ (OSI-Budapest).

2002

სემინარი- „პროფესიული ეთიკის კოდექსი“- OSI-ბუდაპეშტის ფინანსური მხარდაჭერით.

თბილისის წიგნის ფესტივალი ჩატარდა ევრაზიის ფონდის ფინანსური დახმარებით.

2003

თბილისის წიგნის ფესტივალი, ჩატარდა სამაუწყებლო კომპანია რუსთავი 2-ისა და ახალი მემარჯვენეების პოლიტიკური პარტიის ფინანსური მხარდაჭერით.

2004

თბილისის წიგნის ფესტივალი, ჩატარდა საქართველოს კულტურის და ძეგლთა დაცვის სამინისტროს ფინანსური მხარდაჭერით.

2005

ჩატარდა თბილისის წიგნის ფესტივალი საქართველოს კულტურის და ძეგლთა დაცვის სამინისტროს ფინანსური მხარდაჭერით.

გაუმჯობესდა და განახლდა პროექტი: „საქართველოს ბიბლიოთეკის წიგნის საცავი“.

2006

ჩატარდა თბილისის წიგნის ფესტივალი საქართველოს კულტურის და ძეგლთა დაცვის სამინისტროს ფინანსური მხარდაჭერით.

2007

ჩატარდა თბილისის წიგნის ფესტივალი საქართველოს კულტურის და ძეგლთა დაცვის სამინისტროს ფინანსური მხარდაჭერით.

ფრანკფურტის წიგნის ბაზრობაზე წარმოდგენილია საქართველოს ეროვნული სტენდი, რომელიც უზრუნველყოფს ქართულ გამომცემლობათა წიგნების ექსპორტსა და ქართული კულტურის პოპულარიზაციას საერთაშორისო წიგნის ბაზრობაზე.

2008

ჩატარდა შავი ზღვის წიგნის საერთაშორისო ფესტივალი, რომლის ფარგლებში გაიმართა:

სემინარები: „ურთიერთობების გაუმჯობესება“; „ინფორმაციულობის ამაღლება: გზა წარმატებული ინტეგრაციისთვის საერთაშორისო საგამომცემლო პროცესში“. ფესტივალის მხარდამჭერები იყვნენ ევრაზიის ფონდი, ღია საზოგადოება- საქართველო და საქართველოს კულტურის და ძეგლთა დაცვის სამინისტრო.

კვლევა: „წიგნის მოთხოვნილება საქართველოში“ მომზადდა და გამოიცა ევრაზიის ფონდის, ღია საზოგადეაბა_საქართველოსა და საქართველოს კულტურის სამინისტროს ფინანსური მხარდაჭერით.

წიგნის გამომცემელთა და გამავრცელებელთა ასოციაცია გახდა საერთაშორისო გამომცემელთა ასოციაციის (IPA) სრულუფლებიანი წევრი.

ჩატარდა თბილისის წიგნის საერთაშორისო ფესტივალი საქართველოს კულტურის და ძეგლთა დაცვის სამინისტროს ფინანსური მხარდაჭერით.

ფრანკფურტის წიგნის ბაზრობაზე წარმოდგენილია საქართველოს ეროვნული სტენდი, რომელიც უზრუნველყოფს ქართულ გამომცემლობათა წიგნების ექსპორტსა და ქართული კულტურის პოპულარიზაციას საერთაშორისო წიგნის ბაზრობაზე.

2009

საავტორო უფლებებთან დაკავშირებული საერთაშორისო კომნფერენცია დასპონსორდა World Intellectual Property Organization და საერთაშორისო გამომცემელთა ასოციაციის მიერ (WIPO; IPA; IFFRO).

ჩატარდა თბილისის წიგნის საერთაშორისო ფესტივალი საქართველოს კულტურის და ძეგლთა დაცვის სამინისტროს ფინანსური მხარდაჭერით.

ფრანკფურტის წიგნის ბაზრობაზე წარმოდგენილია საქართველოს ეროვნული სტენდი, რომელიც უზრუნველყოფს ქართულ გამომცემლობათა წიგნების ექსპორტსა და ქართული კულტურის პოპულარიზაციას საერთაშორისო წიგნის ბაზრობაზე.

2010

ჩატარდა თბილისის წიგნის საერთაშორისო ფესტივალი საქართველოს კულტურის და ძეგლთა დაცვის სამინისტროსა და თბილისის მერიის ფინანსური მხარდაჭერით.

ფრანკფურტის წიგნის ბაზრობაზე წარმოდგენილია საქართველოს ეროვნული სტენდი, რომელიც უზრუნველყოფს ქართულ გამომცემლობათა წიგნების ექსპორტსა და ქართული კულტურის პოპულარიზაციას საერთაშორისო წიგნის ბაზრობაზე.

2011

ჩატარდა თბილისის წიგნის საერთაშორისო ფესტივალი საქართველოს კულტურის და ძეგლთა დაცვის სამინისტროსა და თბილისის მერიის ფინანსური მხარდაჭერით.

ფრანკფურტის წიგნის ბაზრობაზე წარმოდგენილია საქართველოს ეროვნული სტენდი, რომელიც უზრუნველყოფს ქართულ გამომცემლობათა წიგნების ექსპორტსა და ქართული კულტურის პოპულარიზაციას საერთაშორისო წიგნის ბაზრობაზე.

საქართველოს წიგნის გამომცემელთა და გამავრცელებელთა ასოციაცია

gpba-logo eng

საქართველოს წიგნის გამომცემელთა და გამავრცელებელთა ასოციაცია არის არასამეწარმეო იურიდიული პირი, რომელიც მოქმედებს საქართველოს კონსტიტუციის და კანონმდებლობის შესაბამისად. ასოციაცია, თავისი მიზნებიდან გამომდინარე, მოქმედებს საქართველოს მთელ ტერიტორიაზე და მის ფარგლებს გარეთაც.

ასოციაცია დიდ როლს თამაშობს საქართველოში წინგნის სექტორის განვითარებაში.

საქართველოში რეგისტრირებულ წიგნის გამომცემელთა დაახლოებით 80% ასოციაციის წევრია.

ასოციაცია განსაზღვრავს და იცავს წიგნის სექტორის ინტერესებს, საავტორო უფლებებსა და ბეჭვდის თავისუფლებას საგამომცემლო სფეროში. ასოციაციამ შექმნა პროფესიული ეთიკის კოდექსი, ასევე კანონმდებლობა წიგნის სექტორში პირობების გაუმჯობესების მიზნით.

ასოციაციის მიზნებია:

  1. წიგნის გამომცემელთა და გამავრცელებელთა საერთო ინტერესების გამოხატვა და დაცვა თავისუფალი ბაზრისა და თანაბარი კონკურენციის პრინციპებზე დაყრდნობით;
  2. გამოცემის თავისუფლების დაცვა;
  3. საავტორო უფლებების დაცვა;
  4. პროფესიული ეთიკის ნორმების შექმნა და დამკვიდრება;
  5. წიგნის სექტორის, როგორც დარგის წარმომადგენლობა ეროვნული და საერთაშორისო მასშტაბით;
  6. წიგნის სფეროში დარგის განვითარებისთვის ხელსაყრელი საკანონმდებლო ბაზის შექმნისა და სრულყოფის ხელშეწყობა;
  7. ეროვნული და საერთაშორისო წიგნის ბაზრობების, ფესტივალების, წიგნისა და საავტორო უფლებათა დღის, წიგნთან დაკავშირებული სხვა პროფესიული ღონისძიებების ორგანიზება და მათში ქართველ გამომცემელთა თუ გამავრცელებელთა მონაწილეობის ხელშეწყობა.